logo
Publicate per le Union Mundial pro Interlingua (http://www.interlingua.com)

Invitation al incontro nordic de interlingua in Danmark in 2016

Per Thomas
Create 2015-11-17 18:55

Organisationes de interlingua in quatro paises invita al incontro nordic in julio 2016 - in un nove pais.


Le centro del 15nte incontro nordic de interlingua in julio 2016 essera iste ancian hotel de banio, situate proxime al popular plagia de baniar circa 59 km nord-west de Copenhagen.
  

UMIMappa  Placia ja ora le cruce in tu calendario pro le estate 2016, nam omnes es invitate al 15nte incontro nordic de interlingua que essera arrangiate pro le prime vice in Danmark - e le inscription ha ora comenciate [1].

Le Union Danese pro Interlingua (DIU) es le motor primari detra le incontro nordic 2016 que habera loco de mercuridi le 27 de julio con lunch a dominica le 31 de julio con lunch. Le centro essera Tisvilde Højskole, un ancian hotel de banio que hodie es un centro pro conferentias e cursos, situate cinque-dece minutas de promenada ab le popular plagia de baniar in le grande insula danese Selandia.

Il essera le prime vice que un incontro nordic de interlingua es arrangiate in Danmark, desde que le tradition comenciava in Lund in Svedia in 1988, alora como solmente un incontro dano-svedese, arrangiate per le Societate Svedese pro Interlingua (SSI). Plus tarde le Union Norvegian pro Interlingua e le Association Finlandese pro Interlingua se jungeva e faceva le incontros nordic, ma illos ha desde le initio essite arrangiate omne duo annos in annos par in bellemente situate centros pro inseniamento de adultes in Svedia.

Ora le Union Danese pro Interlingua spera poter recompensar bellemente post haber trovate un equalmente bellemente situate centro in Danmark.

"Nos spera que nos pote expectar un record de participantes. Ja ora nos comencia planificar un programma commode e ben variate pro tote le familia con e bon tempore pro le professional – a saper multe parlar super e in interlingua de como nos face le lingua ancora plus cognoscite e usate – e pro tote le commode e intertenente que anque distingue le incontros nordic, e que pro isto durante multe annos ha attrahite participantes mesmo de Japon al paises nordic," dice le presidente del DIU, Thomas Breinstrup.

Le precio de participation es 3.300 DKK (+ 350 DKK in camera singule). Le precio include omne repastos, quatro pernoctationes, cursos de interlingua, excursiones, belle ambiente, le mar e tote le altere participantes agradabile. Le inscription ha comenciate. Le scheda de inscription e tote informationes (in interlingua e danese) es ci: www.interlingua.dk/nordic2016 [2].

Le Union Danese pro Interlingua organisava le 7me conferentia international de interlingua in Taastrup, vicin a Copenhagen, in 1985 e ha essite co-organisator del previe incontros nordic de interlingua.

Anteriormente, le incontros nordic ha habite cursos intensive pro comenciantes e avantiates mercuridi a venerdi e alora le incontro mesme venerdi a dominica con le possibilitate de usar tote lo que on ha apprendite al cursos. Ma como con le incontro in Svedia in 2014 le arrangiamento in 2016 devenira un "pacco", ubi omnes participa omne cinque dies e assi obtene un sojorno plus agradabile e minus stressate con bon tempore pro audir e usar interlingua.


Adresse de fonte:
http://www.interlingua.com/novas/2015-11-17-incontronordic