logo
Publicate per le Union Mundial pro Interlingua (http://www.interlingua.com)

60 annos con le Union Mundial pro Interlingua

Per Thomas
Create 2015-08-09 12:48

Le UMI ha hodie membros e representantes in cinque continentes.

UMI  Le organisation que uni le fortias pro e le usatores de interlingua, le Union Mundial pro Interlingua (UMI), ha attingite 60 annos.

Le 28 de julio 1955 - quatro annos post le publication del prime libros de interlingua in 1951 - le UMI esseva fundate durante le 1-me Incontro International de Interlingua [0] in le domo municipal in le urbe Tours in Francia. Le intention esseva establir un organisation que coordina le labores del organisationes national e individuos qui usa interlingua activemente e labora pro diffunder le lingua e le cognoscentia a illo.

Le fundation del UMI occurreva a un session le 28 de julio 1955 al Hôtel de Ville in Tours. Le signar del statutos del UMI a pena durava dece minutas. Un trentena de personas ab Danmark, Francia, Grande Britannia, SUA, Svedia, Venezuela e Suissa esseva assemblate pro le prime conferentia international de interlingua ) de facto appellate un "congresso" ) in le citate francese Indre-et-Loire, vicin al urbe Tours. Le UMI appunctava le suisso André Schild como su prime secretario general e le americano Alexander Gode como su prime presidente. Alexander Gode esseva plus tarde redactor in chef del "Interlingua-English Dictionary", publicate in 1951, e le ultime gerente del labor del "International Auxiliary Language Association". Ille esseva in ultra co-fundator e prime presidente del Association de Traductores American, que plus tarde le honorava pro su grande labor.

Hodie le UMI ha membros e representantes in cinque continentes e labora sub le motto "Interlingua - communication sin frontieras". Le Consilio Executive [0] coordina le labor quotidian con i.a. le sito www.interlingua.com con extense materiales de interlingua e le publication de nove litteratura [0] belletristic e professional.

Le jubileo es celebrate durante le 21me conferentia international de interlingua [0] in Benidorm, Espania, le 19-24 de septembre 2015 - e sperabilemente per omne usatores de interlingua in le mundo, qui pote supportar le diffusion de interlingua per facer extra activitates pro attraher le attention public a illo.

Lege anque:


Adresse de fonte:
http://www.interlingua.com/official/2015-08-09-umi