logo
Publicate per le Union Mundial pro Interlingua (http://www.interlingua.com)

Tote cinque libros de Moses publicate

Per Thomas
Create 2015-04-29 16:13

Titulos exhaurite o limitate es de novo facile a comprar.

UMINumeros e Deuteronomio  Le prime parte del Vetere Testamento - tote le cinque si-appellate libros de Moses - ha ora essite republicate in interlingua.

"Numeros" e "Deuteronomio" in le excellente traduction de professor S.W. Buckhalter (1904-1985) appareva le 29 de april, e assi le narration super Moses fini per su morte e funerales. Le cinque libros de Moses forma le si-appellate Pentateucho que es le initio del Vetere Testamento.

"Numeros" e "Deuteronomio" es le plus recente libros que es re-publicate pro assecurar que tote le litteratura in interlingua es ancora disponibile e pote esser comprate. Le Union Mundial pro Interlingua (UMI) ha pro isto decidite prender tote le titulos publicate antea e re-publicar los. Multes de illos es exhaurite, alteres existe in solmente poc exemplares, ma tote le libros debeva esser administrate e expedite manualmente. Post le re-publication, tote titulos pote esser comprate directemente in linea per Internet, ubi on anque pote pagar immediatemente per carta a credito o PayPal e assi reciper plus rapidemente - e a precios plus attractive - le libros desirate.

Plus de titulos va apparer durante le veniente menses.

On pote vider tote le libros e litteratura e comprar e pagar los directemente in Litteratura in interlingua [0]. Memora que tu supporta interlingua e le labor pro diffunder le uso del lingua per comprar libros in interlingua, e al mesme tempore tu maestria del lingua deveni sempre plus bon. Le precios del libros es sempre modeste. On pote sparniar multe moneta per comprar plure libros e solmente pagar le porto postal un vice.


Adresse de fonte:
http://www.interlingua.com/novas/2015-04-29-biblia