logo
Publicate per le Union Mundial pro Interlingua (http://www.interlingua.com)

Duo nove libros preste pro le Die de Interlingua

Per Thomas
Create 2015-01-15 05:39

Quatro contos de phantasmas e un reimpression de "Genesis" del Biblia in interlingua es preste pro le 24te Die de Interlingua, le 15 de januario, ubi usatores de interlingua collabora pro crear attention al lingua e su multe possibilitates.

UMIDie de Interlingua  Le none libro in le nove serie "Facile a leger in interlingua" non debe esser legite in un vespere obscur, proque illo tracta de phantasmas. Ma illo appare hodie al Die de Interlingua [0], ubi anque un reimpression del traduction in interlingua del prime texto biblic, "Genesis", es preste.

Le Die de Interlingua ha desde 1992 essite celebrate omne annos le 15 de januario como le die, ubi omnes, qui labora con o se interessa pro interlingua, face diverse effortios pro attraher le attention al lingua e su possibilitates pro communication sin frontieras. Assi omne activitates - parve o grande - in commun deveni plus visibile pro le mundo.

Contos de phantasmas"Contos de phantasmas" non es pro personas con nervos debile. Ecce quatro historias con phantasmas, scribite per le autor irlandese Joseph Sheridan Le Fanu. Ille esseva le maestro de tal contos in le 19ne seculo – mesmo si ille originalmente voleva scriber grande libros super le historia britannic. Iste quatro contos, pro le prime vice in interlingua, presenta personages vermente terrificante – ma un del contos se developpa de un maniera legier e amusante. Iste libro es le none in le serie de libros, "Facile a leger in interlingua", ubi omne parolas extra le 2.500 definite in “Interlingua – dictionario basic” es explicate (in interlingua) in notas al pede del pagina, assi que omnes pote leger los. Italo Notarstefano de Italia ha de novo traducite e adaptate le narrationes al serie. Le precio es 7 euros, exclusive le porto postal, ma si on compra plure libros, on sparnia adder plus de porto.

Genesis"Genesis" es le prime libro del Pentateucho (le prime parte del Torah e del Biblia), anque appellate le Prime Libro de Moses. Illo es le prime libro in le Biblia e assi del Vetere Testamento e contine i.a. le narration super le creation del mundo e del prime homines, Adam e Eva. Genesis anque narra super le arco de Noe, le Turre de Babel, le tres patriarchas: Abraham, Isaac e Jacobo, e super le prehistoria del populo israelita. Simon William Buckhalter (1904-1985), professor de Irlanda, ha traducite in toto 11 partes del Biblia in interlingua ab le hebreo e fornite le traduction con notas textual. Le libro es le prime de un serie de reimpressiones del originales. Le precio es 8 euros, exclusive le porto postal.

Omnes pote supportar le Die de Interlingua per esser extra active le 15 de januario in le medios social, per arrangiar un exposition o un discurso, e per simplemente supportar le altere activitates e p.ex. comprar alcun libros. On pote anque usar le die pro educar se mesme, p.ex. per prender le multissime materiales gratuite del Bibliotheca electronic in interlingua [0], del grande archivo pro cursos [0] o per audir Radio Interlingua [0] - inter multe altere possibilitates.

Lege plus e ordina "Contos de phantasmas" per www.interlingua.com/facilealeger [0].

Lege plus e ordina "Genesis" per www.interlingua.com/lulu [0].

Lege plus super le Die de Interlingua [0].


Adresse de fonte:
http://www.interlingua.com/novas/2015-01-15-diedeinterlingua