logo
Publicate per le Union Mundial pro Interlingua (http://www.interlingua.com)

Cinque nove invitationes nordic

Per Thomas
Create 2014-12-27 12:06

Enorme cascadas de aqua, un laguna blau, milles de aves que face le Sol nigre, un figura discutite e un belle vista panoramic del recente conferentia de interlingua es le nove motivos in le serie pedagogic "Cartas nordic" - toto gratuite e preste a usar pro apprender interlingua.

UMICartas nordic [0]  In Danmark le celo pote devenir nigre, quando milles de aves coperi le sol. In Islanda on pote baniar in aqua natural de 40 grados sub libere aere, e in le vicinitate enorme multitudes de aqua cade in un grande cascada. A un mercato in un urbe svedese le aqua es minor, ma le arte multo plus spectacular.

In cinque nove "Cartas nordic" [0] omnes es invitate a visitar locos interessante in le cinque paises nordic: Danmark, Norvegia, Svedia, Finlandia e Islanda. Le Cartas nordic es un serie con un carta illustrate de un location nordic. Cata carta contine un breve texto descriptive del loco e un mappa que monstra le position. Sub le carta il ha sempre cinque questiones al texto, assi que on pote studiar le texto attentivemente e apprender plus in interlingua in un maniera amusante e inspirante.

Il ha ora 42 cartas nordic a discargar in le formato PDF, preste a imprimer sur papiro. Il ha anque un breve instruction/inspiration de como usar le cartas nordic pro apprender interlingua.

Le nove cartas veni ab Tønder/Ribe in Danmark e describe le phenomeno "Sol nigre", ab le cascada Gullfoss e le Laguna Blau (le photo) in Islanda, ab Gävle in Svedia con un figura multo discutite in le mercato central, e ab Åsa in Svedia ubi le recente 20me conferentia international e 14te incontro nordic de interlingua in julio 2014.

Le cartas nordic originalmente es publicate in le magazin nordic de interlingua, "Actualitates", con duo cartas in cata magazin. Postea, le Vesperes de Interlingua in Copenhagen elabora le questiones pro le texto, e finalmente le cartas es publicate de novo in www.interlingua.com/instruction [0], del qual on pote discargar un multitude de materiales pro le inseniamento e cursos de interlingua.

Tote le material es in interlingua, assi que illo es universal.

Visita Multe materiales pro le inseniamento de interlingua [0], e discarga tote le materiales gratuite


Adresse de fonte:
http://www.interlingua.com/novas/2014-12-27-cartasnordic