logo
Publicate per le Union Mundial pro Interlingua (http://www.interlingua.com)

Le angulo linguistic: Parolas plural e composite

Per Thomas
Create 2013-08-21 20:44

Parolas del mense

Iste consilios de como usar interlingua correctemente ha essite publicate in le magazin official del Union Mundial pro Interlingua, Panorama in interlingua [0].

Redaction: Thomas Breinstrup
Memora que tu pote sempre consultar le Commission Linguistic del Union Mundial pro Interlingua super questiones lingual de interlingua. Clicca in le navigation a sinistre al puncto Commission Linguistic pro ir al formulario.

Parolas plural e composite

  Cata lingua ha su parolas amusante o curiose. On los discoperi, si on mesme es curiose e sempre defia le nuances del linguage pro parlar lo plus precisemente e con un vocabulario plus large.

Interlingua ha alcun manatas de parolas que omnes consiste de un verbo e un substantivo in plural. Certes es usate frequentemente, alteres non. Ci es alcun exemplos, apprende los como un bon exercitio!

coperi-aures: copertura molle que assecura aures calide
coperipectores: le parte superior de un bikini
coperipedes: copertura pro le lecto
espaventaaves: figura placiate in agros pro terrificar via le aves
essugacapillos: apparato con aere calide (o frigide) pro facer le capillos sic post un banio
essugadiscos: apparato pro nettar discos ante que on los sona
essugamanos: stoffa usate post haber lavate le manos (o le corpore)
essugamobiles: instrumento usate pro nettar le mobiles
essugapedes: matta al entrata de un casa, ubi on pote assecurar que le scarpas non es humide
rumpenuces: instrumento usate pro rumper le scalia del nuces, assi que on pote mangiar los
rumpeundas: mechanismo placiate circum le costas pro minimar le undas del mar ante que illos attinge le terra
sustenepectores: typo de vestimento usate per feminas
tiracorcos: instrumento usate pro remover le corco de un bottilia de p.ex. vino

Commun pro illos es que illos sempre es in plural. Le -(e)s final assi remane sempre. Ma on pote dicer p.ex. un rumpenuces, da me le tiracorcos (e alora on expecta solmente reciper un).

Il ha plure parolas composite in interlingua. Certes de illos non es in plural. Alcun exemplos: grattacelo (altissime edificio que va al celo, o al minus al nubes), rumpecapite (exercitio multo difficile que require uso active del cerebro) e rumpeglacie (un nave pro demolir massas de glacie).


Adresse de fonte:
http://www.interlingua.com/linguistic/parolasplural