UMI  Reclamo pro interlingua es essential pro diffunder le uso practic del lingua. Multe personas non ha ancora audite de interlingua. Si tu desira monstrar tu supporto pro interlingua, tu pote participar activemente pro informar de e promover interlingua.

Involver se activemente non necessarimente significa un grande labor. Es un question de esser creative. Tu ingagiamento essera un inspiration pro alteres.

Abonamento al Panorama
Le prime passo es devenir abonato al Panorama in interlingua, le magazin international de novas publicate sex vices per anno completemente in interlingua. Panorama contine articulos e breve textos super themas actual. Isto es un bon exercitio pro practicar interlingua, e simultaneemente tu es sempre ben informate de initiativas e activitates pro interlingua. Panorama offere mesmo un reduction del precio, si tu vole reciper plure exemplares de cata edition. - Lege plus ci.

Compra un abonamento al bibliotheca local
Ordina e paga un abonamento a Panorama in interlingua al bibliotheca local. Le section de magazines in le bibliotheca es multo popular. Isto es un bon exposition de interlingua, si publicationes in le lingua es a disposition pro le visitatores al bibliotheca. - Usa le formulario de abonamento.

Deveni membro de un association national
Le UMI ha organisationes national in multe paises. Iste organisationes labora pro informar e promover interlingua. Multe organisationes national publica un magazin in le lingua local.

Tu supporta le labor pro interlingua in tu pais per devenir membro del organisation national. Ci tu va haber contacto con altere interessatos de interlingua, e tu ha le possibilitate de prender parte active in le labor pro interlingua in tu pais.

Si il non ha un organisation national in tu pais, tu pote devenir membro del section international del UMI. 

Reclamo pro interlingua in Internet
[ia] Iste texto es in InterlinguaSi tu ha un sito personal in Internet, tu pote facer reclamo pro interlingua in un maniera multo facile. Utilisa iste figura pro indicar le presentia de interlingua in tu paginas del web. Simplemente additiona le sequente codice HTML in le position ubi le figura debe apparer:

   

<script language="JavaScript" src="http://www.interlingua.com/js/textoinia.js"></script>

 

Scribe in interlingua - e crea un signatura de tu e-posta
Si tu es active in foros electronic in Internet, scribe in Interlingua de tempore in tempore. Le reactiones es numerose e positive, quando personas, qui non ha audite de interlingua, discoperi que illes comprende le texto.

Tu pote anque adder un linea con information super interlingua in le fin de cata message electronic que tu invia. In le signatura del expeditor tu pote per exemplo scriber:

  • Interlingua – communication sin frontieras
  • Interlingua es un instrumento practic de communication international
  • Milliones comprende interlingua immediatemente
  • Le grammatica de interlingua es totalmente regular, le vocabulario es international, e milliones de personas comprende interlingua immediatemente
Multe altere possibilitates
E naturalmente tu pote anque usar interlingua durante viages in altere paises romanophone, ubi le population local comprende surprendentemente multo. Tu pote cantar in interlingua. Tu pote assister in le conferentias e incontros de interlingua arrangiate cata anno. Tu pote... - brevemente dicite: haber communication sin frontieras.