Skip navigation.
Home

Apertura official del 23e conferentia international de interlingua (le secretario general del UMI)

le 23e conferentia international de interlinguaJulian Mendez, secretario general del Union Mundial pro Interlingua (UMI)
Apertura official del 23e conferentia international de interlingua.
Praga, Tchechia, lunedi le 23 de septembre 2019, 9.00 horas.


Car omnes,

Io vos da le benvenita al Conferentia International de Interlingua 2019 in Praga. Il es un grandissime gaudio vider le alte grado de participation in iste conferentia.

Io debe excusar me de non esser con vos hodie. Io es impedite de participar in le prime dies pro motivos laboral. Comocunque, io vos accompaniara le ultime dies del conferentia.

Io tentara dicer brevemente que nos attingeva facer recentemente in le Union Mundial pro Interlingua.

Un puncto importante es que nos actualisava nostre rete de representantes national. Isto permitte haber un communication plus directe con ille representates vermente active, e deteger ubi nos poterea meliorar le communication.

Un altere puncto importante es le communication con le parlamentarios europee. Nos faceva un parve texto que monstra le grande avantages de parlar interlingua. Nos traduceva iste texto al linguas del Union Europee, e al momento nos progrede in distribuer electronicamente iste texto.

Finalmente, nos labora al momento in meliorar le sito web. Nos valuta le importantia de un communication fluente con le interessatos. Le melioration del sito web facilitara ille communication, e beneficiara le visibilitate de interlingua.

Con respecto al structura del conferentia, nos seligeva le datas in septembre, proque il ha melior precios, e un tempore minus calide. Io spera que nos pote seliger le datas tentative pro le proxime conferentia in 2021 ante finir iste conferentia.

Nos includeva un stipendio pro fomentar le participation in le conferentias a ille personas qui ha monstrate un labor active pro diffunder interlingua.

Iste anno nos dava le stipendio a Peter Kovacs, qui ha laborate in le Radio Interlingua pro multe annos, e es nostre representante in Hungaria.

Io spera que vos place le programma pro le conferentia. Per favor, non perde le opportunitate de parlar interlingua. Si vos lo face, vos videra como vostre interlingua meliora visibilemente de die in die.

Ante finalisar mi presentation, io volerea regratiar a Madeleine Mahé e a Thomas Breinstrup, qui laborava activemente in le organisation del conferentia. E per ultimo, sed non minus importante, al Union Tchec pro Interlingua, e in particular a Bohdan Šmilauer, qui faceva possibile concretisar le conferentia plus grande de interlingua del decennio.

Alora, io vos invita a parlar e fruer de interlingua.

Multe gratias.

Initio del pagina