Skip navigation.
Home

17-me Conferentia International del Union Mundial pro Interlingua

le 16 ~ 22 de julio 2005  |  Benvenite a Svedia!


Preste al conferentia!

Un septimana multo active attende le participantes de tote le mundo.

50 annos con communication sin frontieras. (c) 2005 Henrik BreinstrupSVEDIA – Le scena es preste pro un multo active septimana excitante e amusante in le signo de interlingua, quando participantes ab tote le mundo le 16-22 de julio se incontra pro le 17-me conferentia international de interlingua in le village pittoresc Åsa, al sud de Göteborg in Svedia, in le agradabile Löftadalens Folkhögskola.
       "50 annos con communication sin frontieras" es le motto del anno.
       Justo iste anno le Union Mundial pro Interlingua (UMI) celebra su 50-esime anniversario. Le UMI esseva fundate in Tours in Francia durante le prime conferentia de interlingua in 1955. Pro isto il habera un exposition de material historic de interlingua e plure presentationes. Un del presentatores es Jeanne Martinet, maritate con le decedite professor André Martinet, qui esseva director de recercas del "International Auxiliary Language Association" (IALA) de 1946 a 1948 in Nove York, i.e. in un periodo significante del formation de interlingua, publicate in 1951. Jeanne Martinet, qui hodie es presidente del Union Interlinguista de Francia, va parlar super le labor con interlingua ante e post le publication del prime libros, "Interlingua-English Dictionary" e "Interlingua - a grammar".

Labor practic
In 2004, il habeva al incontro nordic de interlingua, que anque habeva loco in Åsa, un desiro de plus de labor practic in gruppos. Pro isto, on ha reservate bon tempore pro cargas practic a solver durante le septimana conferential e pro labor in gruppos super un renovation del UMI. In le anno jubilari es placiate le petras fundamental a lo que ha essite baptisate "Le nove UMI", un rejuvenation e renovation del organisation primari de interlingua. Un serie de sessiones va discuter como le UMI pote esser developpate e devenir plus moderne e plus efficace. Hodie il ha membros e representantes in cinque continentes.
       Inter multe altere cosas es date avisos e consilios de como inseniar interlingua, e on excambia experientias super le labor informative pro interlingua in varie paises. In plus, le nederlandese secretario general del UMI, Piet Cleij, va presentar su reporto super le activitates pro interlingua in tote le mundo e reportar super su pensatas pro le tempore a venir.
       Durante le septe dies il habera un quiz del sapientia de Svedia del participantes, intertenimento con p.ex. un film classic bulgare con subtitulos in interlingua, multe discursos in interlingua super themas si differente como recerca actual de interlinguistica, le coordination del leges juridic esteuropee con illos del Union Europee, traditiones antique de dansas in Bulgaria, le situation economic, cultural e politic in Hungaria post le cadita del Muro, e un analyse del errores ordinari e frequente de usatores de interlingua.

Demonstration e intertenimento
Ultra isto il habera un demonstration del programma de telephonar per Internet, Skype, un presentation del sito del UMI in Internet al adresse www.interlingua.com, un demonstration del dictionarios electronic Babylon e Pardon, e un exposition del grande encyclopedia electronic in Internet, Wikipedia, in interlingua. Martedi vespere on se assembla in le gruppos national pro discuter proprie cosas.
       Un numero de participantes va leger un breve texto litterari in interlingua pro dar un impression del linguage. In un altere session, le participantes narra de un cosa atypic ma amusante que representa lor pais. In le vesperes on pote ambular sur le roccas o cantar in interlingua al piano in le sala panoramic. E alora il ha naturalmente le grande festa final jovedi vespere con intertenimento de multissime paises.
       Nulle persona va enoiar se, ni infantes ni adultos.

Multe excursiones
Como sempre, le participantes va a excursiones como touristas in le area. Lunedi postmeridie le 18 de julio offere quatro possibilitates: 1) Un visita al fortalessa in Varberg, situate bellemente, ubi daneses e svedeses luctava plure vices. 2) Un excursion in le natura phantastic de Getterön, un unic reserva de aves. 3) Un visita al Radio Grimeton, que es sur le lista del hereditage mundial de UNESCO. De illo esseva transmittite a transverso del Atlantico. 4) Un excursion al village Äskhult, que es quasi como in le annos 1800.
       Tote le mercuridi, le 20, le tour va in autobus a Göteborg. Göteborg es le urbe le secunde in grandor de Svedia. Primo, il habera un tour con guida in le urbe, pois lunch a un restaurante vicin al nove museo cultural del mundo que on va visitar, e finalmente on pote ir a compras o navigar con le naves touristic.
       Le organisationes local touristic ha benevolemente permittite le traduction in interlingua de tote le material. Illo es distribuite al participantes, pote esser reguardate a www.interlingua.com e va plus tarde esser editate professionalmente.
    



Presenta punctos pro le programma:
Pro arrangiar le optime conferentia le organisatores ha invitate omnes a contribuer con propositiones de punctos concrete e motivate pro le programma. Pois que le programma es ora preste, on non plus pote inviar propositiones.


Apertura: Le session de apertura del 17-me conferentia international de interlingua es le 16 de julio a 17 horas. Le conferentia fini le 22 de julio a 12 horas. 
In junio le participantes recipera un Libretto Conferential con tote le programma del Conferentia.

Initio del pagina