Skip navigation.
Home

17-me Conferentia International del Union Mundial pro Interlingua

le 16 ~ 22 de julio 2005  |  Benvenite a Svedia!


Grimeton – un hereditage cultural con extension global

 
Le scopo de UNESCO, le institution del Nationes Unite, es stimular beneficio international e contribuer a pace e education re derectos human. In isto es includite augmentar le comprension e le respecto pro le hereditage cultural de paises e populos differente, con le supporto del convention de hereditage mundial.
Le station de radiodiffusion extra Varberg esseva inscribite in le lista de hereditages mundial de UNESCO in julio 2004. Objectos que es adoptate in le lista reflecta, in un maniera completemente unic, le historia del terra e le homine in un perspectiva global. Illos es tanto preciose que il es un affaire pro tote le humanitate conservar e guardar istos pro generationes futur.
 

Photo: Henrik Enfors
Le edificio del station. Photo: Henrik Enfors

Un hereditage technic al genere human
Le station de radiodiffusion Grimeton esseva ponite in action in 1924. Illo esseva edificate pro communication radiophonic sin filo e formava parte in un rete mundial de stationes a undas longe, omnes equipate con le technica revolutionante developpate per le svedo-americano Ernst F.W. Alexandersson. Unic pro Grimeton es que hodie illo es le sol installation conservate de iste rete, olim global. Isto significa que Svedia, Halland e Varberg pote paradar con un hereditage technic lo que non simila a alcuno altere, alterubi - e que ancora functiona.
     In ille tempore il esseva le competition industrial, le ambition pro pace inter le paises e le emigration que conduceva le developpamento technic. Hodie, octanta annos plus tarde, nos vide prender forma un nove ambiente technic mundial, e nos non besonia ir a retro multe annos pro comprender le developpamento rapide intra iste industria genial – e le developpamento incessantemente continua. 
     Con isto anque un capitulo in le historia de Grimeton fini. Ma un nove jam ha comenciate esser scribite. Le historia de Grimeton es un ligamine unic in le historia del telecommunicationes del mundo. E nunc un nove futuro e developpamento como hereditage mundial attende. Nam, si nos volera comprender a ubi le nove technica es in cammino il anque es importante saper de ubi illo ha venite. Pro iste ration Grimeton es alcuno plus que un capitulo finite in le historia technic.

Grimeton, le ligamine a America
Telegraphar electricamente, secundo le si nominate systema de Morse, esseva introducite in le continente in le annos 1840 e jam in 1857 il habeva in Svedia un rete telegraphic filose que se extendeva de Ystad a Haparanda .Connexion telegraphic con le continente esseva obtenite in 1855 e con America in 1866.
     Le prime essayos svedese con telegrapho sin filos esseva facite in 1899 in le marina de guerra e le technica applicate esseva le transmission de information con adjuta de undas radioelectric que habeva essite developpate per le physico italian e laureato del premio Nobel, Guglielmo Marconi in 1895.
     Le communicationes trans le Atlantico durante e post le prime guerra mundial ancora functionava mal e le parlamento decideva in 1920 re edification de un station de emission respectivemente reception pro connexion directe con America. Le decision pertineva a un plano gigantesc de ille tempore, que visava a, via Radio Central in Long Island presso New York, generar un rete global de stationes de radiodiffusion a communication sin filos. 
     Le edification del station a emission esseva comenciate in 1922 e Grimeton pro le prime vice functionava con diffusion le 1 de decembre 1924. Le signal de appello esseva SAQ in 16,7 kHz (18,6 km longitude de undas) postea alterate a 17,2 kHz (17,4 km longitude de undas). 
     Importante pro le location del installation esseva que le undas radioelectric debeva passar super aqua, e in Grimeton le paisage cultivate aperte offereva passage libere verso le costa e le mar al west.
(Commentario del traductor: Sur un globo terrestre on pote vider, con adjuta de un corda, que Varberg es le sol loco de ubi on pote designar un linea rectilinee a Long Island, sin tanger Norvegia, e solmente tanger un curte parte del nord de Jutlandia, que fortunatemente es multo basse.)

Photo: Henrik Enfors
Le sex turres, 127 metros alte. Photo: Henrik Enfors

Le undas radioelectric es generate per generatores rotante a frequentia alte. Le sex turres de antenna, 127 m alte, es placiate con 380 metros de spatio. Illos es providite con un trabe transverse, 46 metros large, que supporta le cordas del antenna. Al ambiente cultural authentic pertine, excepte le edificio del station e le antenna multiple imponente, un numero ulterior de edificios de interprisa ben conservate, tamben le “vico de radio” que esseva edificate pro le empleatos. Restante, in stato ben conservate, anque es le vetule auto del station, un Chevrolet del anno 1931.
     Grimeton esseva inaugurate officialmente le 2 de julio 1925 per le rege Gustav V. Desde alora multo ha evenite. 1938 le prime probas con undas curte esseva realisate. Le secunde guerra mundial precipitava le developpamento, le numero de emissores a undas curte augmentava rapidemente, e ancora hodie un vintena de emissores es in function. Gradualmente anque emissores de FM e emissores de TV assi como stationes de base pro servicios mobile es establite.
     Le station de reception esseva edificate in Kungsbacka in Halland lo que, in paritate con le station de emission, esseva in communication con le station telegrahpic in Gothenburg, ubi telegrammas arrivante e quittante esseva expedite.

Ernst Alexanderson - un pionero svedese de radio 
Le corde del station emissori, un si nominate alternator o generator de currente alternate de 200 kilowatt, esseva construite per le electroingeniero native in Svedia, Ernst Alexanderson (1878-1975). Post le examine como ingeniero civil in Stockholm e education continuate in le Schola technic superior de Berlin, Alexanderson emigrava in 1901 a SUA ubi ille laborava como inventor, constructor e ingeniero principal apud General Electric e Radio Corporation of America (RCA). 
     Durante su longe vita Alexanderson participava in le developpamento de omne sectores de electrotechnica. De grande importantia esseva su prestationes re radiotechica e principalmente in le developpamento de generatores a frequentia alte pro communication durante e post le prime guerra mundial. Ille de bon hora comprendeva le possibilitates del tubos de radio e faceva experimentos que duceva a emissores e receptores etiam pro undas curte.
     Pro su invention del generator a frequentia alte Alexanderson esseva incorporate posthumemente in 1983 in “The National Inventors Hall of Fame (Le Hall de Fama de Inventores National) - un homage que ille participa con le inventores Edison, Bell e Marconi. In total 20 emissores de Alexanderson esseva contruite per General Electric in SUA e esseva installate in multe locos del mundo integre. Hodie solmente uno es conservate – illo in Grimeton. 

Le lista unic del hereditages mundial
UNESCO – le organisation pro education, scientia e cultura del Nationes Unite – esseva fundate in 1945 in un mundo que esseva in processo de elevar se ex le ruinas post le secunde guerra mundial. Le scopo del organisation es incitar beneficio trans le frontieras e contribuer a pace e education in derectos human. In isto anque es includite augmentar le comprension, e con isto le respecto, pro le hereditage cultural de paises e populos differente.
     Le convention de UNESCO re conservation e protection de hereditages natural e cultural del mundo esseva adoptate in 1972. Svedia ha, conjunctemente con 172 altere nationes signate le tractato e per isto se ha obligate respectar iste regulas. Le protection del ambientes natural e cultural es generate per medio de registrar los in le lista de hereditages mundial.
     Le pyramides de Egypto, Le muralia de China, Le Vaticano con le Ecclesia de Sante Petro – e nunc Grimeton, pertine al quasi 800 objectos que hodie es includite al lista exclusive. Con su qualitates specific Grimeton es un excentrico in iste gruppo etiam si le hereditages mundial Darjeeling Himalayan Railway (Le ferrovia de Darjeeling in Himalaya) in India como le vias aquatic francese de Pont du Gard e le Canal du Centre belgic anque illos connecte al thema historia de communication. In le lista de hereditages mundial il anque ha locos que rememora al aspectos sombre del historia del humanitate como le insula a prision Robben Island in Sudafrica e le campos de concentration Auschwitz e Birkenau in Polonia.

Grimeton - un hereditage vivente
Devenir includite in le lista de hereditages mundial apporta un grande responsibilitate ma anque grande possibilitates. Le “viage” a recognoscentia international es un prestation del qual nos debe esser fer ma illo anque significa que nos ha assumite conservar le installation in un maniera que non rumpe ma fortifica su valores.
     Pro generar un responsabilitate repartite, e un dialogo vivide, inter le mandatores de Grimeton e le ambiente, un organo de cooperation ha essite generate – Världsarvsrådet Halland (Le Consilio del Hereditage Mundial Halland). Su scopo es facer Grimeton a un exemplo de developpamento durabile e le 70 milliones coronas investite in le renovation del installation es un fundo bon sur le qual on pote star.
     Al cargas que le consilio del hereditages mundial ha indicate como specialmente importante pertine veliar a Grimeton como un hereditage mundial vivide pro assecurar le competentia a manear e diriger le installation ancora functional. Un altere es conservar le hereditage mundial como un fundo in le developpamento del societate. In isto es includite i.a. edificar un centro de visitas e informationes ante le estate de 2005. Al questiones que ha prioritate alte anque es includite facer le hereditage mundial a un ressource pro le societate de education. 

Visita le hereditage mundial Grimeton
Il es facile trovar le dece-tertie hereditage mundial de Svedia! Le turres del station es vidite al est de E6 apud Varberg.
Ab E6: Partita no 54, via no 153 verso Ullared/Varberg. Apud le ecclesia de Gödestad al dextere verso Grimeton (verso le turres de antenna visibile). Seque le indicator “Radiostation”. 
Ab Ullared/Varberg via 153: Ante Rolfstorp al sinistre verso ”Grimetons kyrka”. Seque postea le indicator ”Radiostation”.

 

Horas de apertura 2005
le 5 de julio-21 de augusto demonstrationes guidate cata hora de 11 a 16. Lunedi claudite.

Pro information e reservation de gruppos, telephona a 0340-674190.

Benvenite in le nove centro pro visitatores e information del hereditage mundial Grimeton con café e boteca!

Le Consilio del Hereditage Mundial Halland
Stiftelsen Världsarvet Grimeton (Le Fundation del Hereditage Mundial Grimeton) Länsstyrelsen Halland (Le Governamento Provincial Halland), Regionalförbundet Halland (Le Association Regional Halland), Varbergs kommun (Le communa de Varberg), Hallands Länsmuseer (Le Museos Provincial de Halland) e le fundation ITERNIA in cooperation con ALEXANDER – Grimeton Veteranradios Vänner (Le Amicos del Radio Vetule de Grimeton) 
whc.unesco.org –  www.raa.se –  www.alexander.n.se   

In iste pagina: Le brochure official. Traduction in interlingua per Erik Enfors, le Societate Svedese pro Interlingua. Publicate con permission

Initio del pagina