Skip navigation.
Home

17-me Conferentia International del Union Mundial pro Interlingua

le 16 ~ 22 de julio 2005  |  Benvenite a Svedia!


Le castello e le fortalessa de Varberg

Le brochure official, traducite in interlingua per Erik Enfors, 2005. Publicate con permission

LE MEDIEVO 
Le castello sur le rocca 

Le 13e seculo
Le rocca sur le qual nos sta ha essite appellate Wardberg durante longe tempore ante que le urbe Varberg existeva. Le prime syllaba “Ward” significa guarda. Jam durante le tempore prehistoric le rocca esseva utilisate pro guarda. Si inimicos se approchava le litore, un grande foco (fanal) esseva accendite como signal a defensa. Un castello es edificate solo durante le fin del dece-tertie seculo. Le rege danese Erik Glipping es assassinate, e le conte Jacob Nielsen, possessor del parte nord de Halland, es accusate pro le assassination e lassa como protection edificar un castello sur le Wardberg durante le annos 1287-1300. Le ala al nord del castello existe desde iste prime tempore.

Le 14e seculo 
Le 14e seculo esseva un tempore turbulente, e durante le periodo 1305-1365 Varberg cambiava regno non minus que octo vices. Varberg esseva un del castellos del stato. Magnus Eriksson, Albrekt de Mecklenburg e regina Margareta esseva personalitates regal qui de tempore in tempore resideva in le castello de Varberg. Durante le annos 1343-1344 Magnus Eriksson con accompaniamento sovente esseva in Varberg. Probabilemente Magnus habeva su regina Blanka con se, cognoscite del canto popular ”Rida, rida ranka…” Desde 1365, le circumstantias se stabilisava, e Danmark governava Varberg durante quasi 300 annos postea.

LE ANNOS DEL 16e E 17e SECULOS
Cannones e fortalessa

Le 16e seculo 
Le guerra nordic de septe annos ragia inter Danmark e Svedia in le annos 1563-1570. Durante le dece-sexte seculo le deposito de armas es developpate ab flecha, lancea, funda de petras e arcoballista a cannones. Alora le constructiones de defensa del castello con muras de petras circum un corte de castello non suffice. In vice il es necessari edificar un establimento de defensa externe con grande vallos de terra revestite de petras, e con bastiones, pro esser protegite del cannones del inimicos. Le edification del fortalessa es comenciate in 1588.

Le 17e seculo 
Le rege danese Christian IV esseva le detentor del poter e edificator, qui effectuava le nove systema de defensa in cooperation con le architecto nederlandese Hans van Steenwinckel. Durante le jornos de travalio circa 1.000 paisanos esseva ingagiate in transporto de petras e terra pro le edification del fortalessa. On ha calculate que le paisanos de Halland effectuava 2 milliones jornatas de labor durante le 30 annos del edification. Le fortalessa de Varberg esseva in 1618 un del constructiones le plus moderne de defensa in Europa ma non esseva postea jammais involvite in alcun guerra. In 1645 le Pace de Brömsebro esseva concludite, in le qual il esseva decidite que Halland e Varberg deberea pertiner a Svedia, non plus a Danmark.

LE ANNOS DEL 18e, 19e E 20e SECULOS 
Militares – prisionieros - cultura

Le 18e seculo 
Le militares svedese prendeva cura del fortalessa durante le dece-octave seculo pacific. Il ha un extense material de designos de iste tempore que i.a. demonstra le numerose obras de reparation.

Le 19e seculo 
In 1830 le castello de Varberg finiva esser un establimento militar. Le fortia militar se concentrava al fortalessa de Karlsborg. On proponeva que le fortalessa de Varberg debeva esser dynaminate. Fortunatemente iste proposition non esseva acceptate. Partes del fortalessa habeva durante le 17e, 18e e 20e seculos essite utilisate pro custodia de prisionieros. Ma le grande epocha de prisionieros occurreva 1848-1881, quando 400-500 prisionieros sojornava ibi simultaneemente. In 1856 un prision con cellas esseva edificate, previemente le prisionieros esseva placiate in grande cameras commun. Le prisionieros esseva occupate primarimente con extraction de petras.

Le 20e seculo 
Durante le 20e seculo le edificios del fortalessa ha essite adoptate pro museo, albergo de juventute e restaurantes. Depost le Pace de Brömsebro, le fortalessa de Varberg ha escappate devastationes de guerra, ma naturalmente non injuria del tempore. Hodie le Autoritate Statal de Proprietates (Statens Fastighetsverk) in cooperation con le Museo Provincial gere e cura le castello e fortalessa de Varberg.

________________________________

LE MUSEO REGIONAL DE VARBERG 
LE FORTALESSA / FÄSTNINGEN
432 44 VARBERG 
Tel. 0340-185 20, fax 0340-147 22 
e-posta: kansli@lansmuseet.varberg.se 
Internet: www.lansmuseet.varberg.se 

Horas de apertura lunedi-venerdi 10-16 horas, sabbato-dominica 12-16 horas le medietate de julio-le medietate de augusto: omne dies 10-18 horas

LE ALBERGO DEL FORTALESSA DE VARBERG 
70 lectos in cameras de un, duo o plure lectos con accesso a cocina. Possibilitates conferential existe. Aperte tote le anno. Reservation durante le periodo de alte saison 8-10 horas & 17-21 horas, ultra isto a dies de labor 15-17 horas. Tel. 0340-887 88, fax 0340-62 70 00. 
Internet: www.turist.varberg.se 

______________________________________

Photo de copertura: Arne Persson, le Museo Regional de Varberg. Photo aeree: Sven-Erik Petterson. Texto: Pablo Wiking-Faria. Designo graphic: Anette Krantz, Svanenlic. Brochure no. 341 137 Varbergstryck 0340-61 12 75 (03981). Nove impression 2003

______________________________________

Le Autoritate Statal de Proprietates es responsabile pro edificios, parcos, forestes e agros in possession del stato svedese. Le majoritate del proprietates pertine al hereditage national cultural per le quales es considerate edificios e monumentos que face un parte essential del historia svedese. Nos administra le castellos regal, le edificios governamental, Riddarholmen, Skeppsholmen e Kastellholmen in Stockholm, le residentias del burgomaestros regional, le Bibliotheca Regal, le theatros e museos statal e proprietates que ha essite donate al stato. Nos administra anque proprietates possedite per le stato in altere paises, i.a. le ambassadas, como plus vetule edificationes de defensa militar de valor cultural-historic, per exemplo le fortalessa de Bohus e le castello de Vaxholm. Le Autoritate Statal de Proprietates administra mesmo grande areas de terra al west del frontiera de cultivation in le regiones Norrbotten e Västerbotten e areas de pasturar del renes in Jämtland-Härjedalen, agros in Dalarna del nord, le (pen)insulas in possession del stato vicin al costa svedese e tractos de rivos - e lor affluxos - al protegite rivos in Norrland. Le Autoritate Statal de Proprietate es responsabile pro proteger, conservar e developpar omne iste proprietates pro le bon del visitatores e citatanos in le pais.

STATENS FASTIGHETSVERK Box 2263, 103 16 Stockholm Tel 08-696 70 00, fax 08-696 70 01 

In iste pagina: In le fortalessa de Varberg il ha hodie le Museo Regional de Varberg. Le expositiones basic del museo reflecte tote le historia de Halland, su cultura de edification e su developpamento agricultural. Le attraction le superior es le Homine de Bocksten (Bockstensmannan) - un del trovatas medieval le plus interessante in le mundo con un vestimento completemente conservate. In expositiones cambiante es monstrate historia de arte e cultura. Tours con guida in le Museo Regional de Varberg e le fortalessa es reservate via le museo. Presentationes del fortalessa pro le publico prende loco quotidianmente durante le saison estive.

Initio del pagina