Skip navigation.
Home

Le guarda national de Bulgaria - traditiones e defias

UMI  Milen Shopov. Discurso al 15e Conferentia International de Interlingua.
Gdańsk, Polonia, venerdi le 3 de augusto 2001, 17:30 horas.


Vos pote judicar pro un pais secundo multe cosas. Normalmente on comencia per le maniera de qual illo es construite e governate. Sic nos pote concluder super su situation in le momento e super le directiones in le qual illo pote disveloppar se. Un altere vista nos permitte de appreciar le standard de vita e le conditiones de benesser del homines que iste pais assecura. Si on non ha altere possibilitates, on reguarda attentivemente le historia como un base de comparation, de qual on va comenciar pro poter concluder si le pais se disveloppa in le direction correcte o si illo debe passar un longe via ancora. Sed omne isto non es includite in le maniera de qual cata un homine percipe le mundo, isto es plus tosto in le sphera del objecto de diverse recercas politico-social.

On dice que pro le personas separate le plus importante e determinante resta le prime impression. A causa de isto in le initio io va proponer a vostre attention un breve conto, cuje subjecto pote esser cata un homine de stato qui ha visitate Bulgaria, proque alicun impressiones es reservate a un circulo restricte de homines, lo que es lamentabile. Sed nunc vos omnes va tanger un ver symphonia de beltate, colorito e magnificentia, incarnate in le senso inimitabile del contacto con le cosas ignote. E solmente nunc vos es permittite de imaginar que vos es al minus un capite statal.

Bon, on comencia. Primo, imagina como vostre aeroplano va atterrar in le aeroporto del capital bulgare Sofia. Que on attende de un pais balkanic que usque recentemente esseva in le subterraneo del continente europee? Le avion tange le beton del pista, reduce su velocitate e rola verso le parte del aeroporto que es reservate pro le visitores de nivello statal. Post alicun minutas vos jam descende le scala. Post haber descendite in terra firme vos leva oculos al personas qui vos attende. Como sempre, isto es le personas official del pais visitate, con le qual vos intercambia parve parolas amabile e, reguardante super lor dorsos, vos tenta de fixar le prime vistas del nove pro vos parte del mundo. Tunc vos LES vide.

Photo 1

A prime vista illes sembla esser statuas, como si de lor immobilitate depende le existentia del mundo. Lor vestimento brillante evoca immediatemente un interesse e lor forma impressiona — on dicerea que usque al ultime momento illes se ha effortiate de facer lo vermente perfecte. "Como puppas"— pensa vos. Sed iste illusion dura solmente un momento — usque al minuta ubi vos leva vostre oculos e senti lor vista fixate in le vostre.

Como si illo vole imponer vos un respecto. In le prime momento le sentimento es vermente tal, sed vos rapidemente vide le calor in le oculos del soldatos. Mesmo si, a prime vista, immobile e impressionante, illos vole dicer vos primo "Benvenite!" Vos pote jam calmemente contemplar les. Illes sta le un verso le altere, in recte filas que vos pare facite sur un filo, tene firme lor armas in position "respecto!" — illes vermente es hic pro monstrar le respecto de tote le nation re vos. E illes lo face ben. Mesmo exceptionalmente.

Photo 2

Vos non pote saper que ante vostre atterramento in lor pais illes se ha preparate de attender vos, que alicun minutas ante que vos sorti del porta del avion illes ha formate un ordine precise, marchante in tacto verso lor locos. Vos ha solmente audite alicun parolas non multo clar del officiero commandante e post isto omnes ha levate lor armas in position "respecto!". Le commandante, tenente firme in su mano un spada, vos reguarda seriosemente in le oculos e vos seque con su vista quando vos passa. Vos vos senti obligate de facer un signo de salutation con le capite. Un breve momento, e ille etiam move su capite como responsa, breve e sic, e le pluma de aquila in su capello tremula in un secunda. Un surriso quasi imperceptibile passa per su facie e post isto ille, de novo seriosissime, sta in attender que vos continua de marchar. Passante inter le filas del guardianos bulgare vos pote solmente contemplar les. Solmente alicun minutas ha passate e vos es jam plus que ric con impressiones interessante. Vos non vide como, post vostre partita con le auto, le armea de parada in marcha con tacto perfecte quita le aeroporto pro incontrar vos de novo post alicun minutas.

Photo 3

Vos es in le centro del capital bulgare. Vos va haber un incontro official con vostre hospite. Vos jam pensa al conversationes veniente, durante le qual vos va intercambiar breve parolas amabile e, haber lassate le sinceritate a un secunde plano, vos va diplomaticamente discuter le questiones que debe esser resolvite inter vostre duo paises. Vos es surprendite quando in le centro de Sofia vos de novo incontra le armea de élite que vos jam cognosce. Ibi vos incontra anque vostre hospite. Post haber stringite su mano vos veni al ordine del guarda. Illo de novo es ibi, silentiose e attendente le commandamentos de su chef. Un cosa nove pro vos es le presentia del orchestra militar que accompania con musica tote le rito del incontro.

Photo 4

Quando vos avicina le filas, le commandante pronuncia le parolas jam cognoscite que face omne le soldatos de monstrar respecto con lor armas. Le commandante se dressa ante vos, a un certe distantia, e recita su reporto. Vos bassa le capite in responsa e con vostre hospite vos passa inter le filas del guarda national. Iste vice le filas es plus grande e vos tenta de memorar toto lo que vos impressiona — e illo non es pauc. Vos cognosce solmente le vestimento que, como ante, es in forma irreprochabile. Su effecto es immense. Omne guardianos sembla esser formate secundo un singule modello. On comencia per le nigre calligas con linea blanc in le parte superior e le calcares argentee, cuje fines es un presso le altere, on passa per le vestimento ideal — le guantos blanc, le brich blau con lineas argentee e le kittel, circumdate per un collant rubie o blanc in contrasto con le color rubie o blanc del kittel que depende del stationes, e on fini per le capello del guarda que es blanc o gris secundo le stationes. Il ha un elemento immutabile — le pluma de aquila que monta verso le celo de ubi illo ha venite. Exactemente illo da a cata un guardiano le magnificentia inimitabile que personalisa le idea mesme del guarda national bulgare. Le oculos reguarda firme, mesmo transfixante a momentos, como si illo vole imponer respecto ante le figura immobile del soldato bulgare qui incarna le magnificentia de tote le armea bulgare, que non ha permittite que ulle bandiera cade in le manos del inimicos durante tote le nove historia del pais.

Photo 5

Sed vos ha ancora plure cosas a vider. Con le sonos del tambures le ordine del guarda se reforma in blocos. Ab ante, como sempre, es le orchestra. Illo es immediatemente sequite per le bandiera del guarda e per omne le soldatos. Le commandante da ordines e sub le sonos de un marcha melodiose le blocos passa. Vos de novo remarca le precision incredibile con le qual toto es facite. Le arma es perfectemente lineate sin mover durante le marcha del soldatos. Nunc vos pote vider e le passo de parada que utilisa le guarda bulgare. On es impressionate per le pede perfectemente tendite que non es curvate in le genu. Le pedes, tendite in spitz es montate in un grande altitude e con sono forte batte le terra. Le manos es montate ante le thorace, curvate in un angulo recte e de novo se tende a infra, correspondente al tacto del marcha. Sed le plus importante es que isto es facite per omnes simultaneemente, como un singule persona, creante un impression de precision incredibile, que es si typic pro le guarda national cuje vocation es de facer exactemente isto: honorar cata un visitante official del stato bulgare de lassar pro longe tempore in su conscientia le memoria pro le prime cosa que ille ha vidite post haber ponite su pede sur le solo bulgare.

Toto lo que vos ha audite e tangite sona a momentos como un fabula magic. Naturalmente le impression real es ancora plus emovente e interessante e su fortia fabulose non permitte a ulle persona de restar indifferente. Io personalmente desira que vos vide isto. Sed como nos omnes sape, sub iste magias es coperite multo difficile labor que cata die es un parte del preparation del guardianos bulgare. Que nos presta nunc attention etiam a isto, pro que vos pote comprender como on realisa le perfection que vos ha vidite, ben que pro un momento.

Permitte me que io resolve immediatemente le dubitas que forsan ha nascite. Le composito ordinari del guarda national bulgare non es completate per soldatos professional. Le soldatos del ordines del guarda face su servicio militar que es le deber de cata un juvene bulgaro. In le Constitution del Republica de Bulgaria, articulo 59 (cinquanta-nove), alinea 1 (un) es dicite: "Le protection del patria es deber e honor pro cata un citatano bulgare". Cata un guardiano ha conscientemente sentite isto profundemente in se e ha trovate pro se mesme lo que le da un motivation de complir su deber militar. De plus, le character mesme del servicio in le guarda national dispone al creation de un alte conscientia pro se mesme in cata un soldato. Io mesme cognosce ben iste virtutes militar proque io ante solmente duo annos esseva parte de iste ordine del guarda que, io spera, vos ha imaginate in su plen splendor. Sed io va lassar mi sentimentos personal al secunde plano proque io ha le mission de presentar objectivemente ante vos le guarda national bulgare.

Le processo de construction del personalitate de un guardiano e de su education e trainamento, cuje scopo final es que ille deveni un quadro effective del armea de parada, non es ni breve, ni facile. Le initio es ponite con le entrata del soldato in le ordines del armea. Le prime defia es le preparation perfecte pro dar le juramento pro un servicio fidel al patria. Apud le guardianos iste momento es splendide exactemente como omne altere evenimentos con lor participation.

Photo 6

Post haber passate sub le bandiera de combatto e haber pronunciate le parolas "io ha jurate!" illes deveni un parte del belle fabula que lassa tracias in lor memoria usque al fin de lor vita. Tunc comencia le difficile via al perfection que debe esser passate per cata uno pro poter portar con orgolio le pluma de aquila. On face exercitios cata die. Le conditiones meteorologic quasi non importa. E il es impossibile de ager differentemente, proque on non sape in qual tempore on debera laborar. Battite per un vento forte, baniate per le pluvia o coperite de nive, le guardianos bulgare non ha le derecto de tornar se e illes non pote permitter se mesme un momento de debilitate. E isto es le scopo del lor education — esser firme ante le difficultates, proque exactemente isto es le maniera de disveloppar se como personalitate que es digne de estimation de su collegas, su commandantes e del homines qui ha venite pro contemplar.

Photo 7

De importantia equal al construction del spirito es anque le apprension del technica de laborar con le armas executante le choreographia del marcha. Pro le realisation de un preparation irreprochabile in le guarda national bulgare on conta multo sur le successibilitate. Isto significa que cata un soldato qui ha plus servite se occupa del education del soldatos qui ha entrate plus tarde in le ordines del guarda pro transmitter lo que ille ha apprendite de su seniores. De enorme importantia pro le processo educative es anque le actiones del commandantes de omne grados. Con su experientia e cognoscentias iste sergentes e officieros contribue multo pro le formation del guardiano bulgare, lassante un particula de se mesme sur le placia, ubi le processo educative se realisa. E isto es vermente necessari. Le labor specific del guarda national exige in cata un momento un preparation perfecte e condition ideal de omnes in le ordine del guarda. Pro isto le exigentias re le education e le trainamento de cata uno es altissime. Le choreographia del movimento debe esser effectuate perfectemente per omnes. Il non ha un altere possibilitate, proque quando on es in le ordine tote le filas debe facer cata un movimento simultaneemente. Isto es valutabile non solmente pro le movimento del armas, sed etiam pro le displaciamento del corpore quando il es necessari de cambiar le position del filas in le spatio. In le mesme tempore on debe a cata un movimento tener conto del lineamento ideal del soldatos e del armas, independente del position general. Pro poter maestrar iste habilitate omnes debe facer grande effortios e consecrar tote su attention e pensata. Cercante in lor memoria le majoritate del guardianos determina como le cosa difficilissime le movimento in tacto. Io pote solmente confirmar iste impression. E como pote esser differentemente, quando tu debe non solmente esser precisissime in cata un movimento, sed etiam on es absolutemente obligate de facer toto exactemente como le alteres. Sin curvar le genu, le gamba e le pede es tendite in ante, in un altitude strictemente determinate, e tange le terra in un singule momento con pulsion que produce un sono forte, impressionante per su fortia e tacto precise. A isto es addite le sono del calcares que es sur le calligas. Le marcha a loco, le stoppamento e le movimento synchronic es elementos specific a qual on presta un attention special.

Toto isto es un condition pro que le ordine del guarda ha un forma perfecte, nonobstante su scopos concrete. E iste scopos pote esser diversissime. Le guarda national bulgare participa al ceremonias de incontro de delegationes governamental, chefs de stato e altere representantes official del statos independente de tote le mundo. Le guardianos assiste al accreditation del ambassatores estranier qui da lor litteras-mandatos al Presidente de Republica de Bulgaria Durante le demonstration de respecto verso le soldatos perite in le guerras, le ceremonia de poner coronas de flores ante le monumento es de novo conducite per le guarda national.

Finalmente nos pote adder le vigilia de honor ante le Edificio del Presidente in le capital e sic concluder le circulo de scopos del subdivision de parada bulgare. Vos vide que mesmo a prime vista isto non sembla esser facile. Sed cata un difficultate surmontate pote solmente firmar le voluntate e le persuasion que le stato bulgare debe esser servite per honor e dignitate, specialmente quando on es vocate de representar iste stato ante visitantes de plus alte grado.

Le labor del guardianos non fini con isto. Como cata un subdivision militar, illes ha etiam labor re le organisation interne del servicio, que non debe esser offendite per le facto que le tempore sovente non suffice. Le commandantes de omne grados effectua un processo de education interminabile e practic que transforma le juvene soldato in un bon guardiano. De mesme importantia es le effortios pro cata un soldato que le assecura un bon disveloppamento como specialista e personalitate, pro que ille pote reprender su loco in le vita civil. Quanto al guardiano, ille debe respectar le disciplina militar, strictemente effectuar le ordines de su commandantes, facer orgoliosemente le servicio in le subdivision de parada. Pro haber realisate iste scopos il ha anque mercedes incoragiante. Primo, isto es le dies libere que cata uno attende con impatientia. Non minus importante es anque le possibilitate de disveloppamento in le hierarchia militar, que da un chance al optime soldatos de facer un carriera.

Photo 9

Le confidentia e le carga de responsabilitate crescente sin dubita construe in le soldatos un comportamento melior e duce anque a melioration del lore labor. Le resultato de tote isto es le presentation perfecte del guarda national a cata loco ubi on besonia su servicios.

Con isto le presentation general del preparation del guarda national bulgare debe finir. Il es lamentabile que non toto pote esser dicite. Alicun cosas resta del altere latere del muro del subdivision del guarda. Nos pote solmente rememorar nos de illos, sed le denunciation ante un publico non es desiderabile proque isto esserea un violation del secreto militar. Et pro vos importa lo que cata un pote sentir e perciper pro se mesme. Il es evidente que sub le belle fabula resta multe difficultates e problemas que le homines del guarda bulgare surmonta con honor e con le sentimento de un deber complite.

Forsan nos ha devenite multo seriose. E bon, io va contar vos ancora un ultime fabula. Su subjectos principal es de novo le guardianos bulgare, e le loco del action iste vice es exactemente determinate. In le corde de Sofia il existe alicun magnific edificios, construite ante plus de 50 (cinquanta) annos. Presso le hotel "Sheraton" parte del popular catena mundial, a boulevard Donducov numero 2 (duo) vos pote vider le Edificio del Presidente. Isto es le loco ubi labora le chef del Republica de Bulgaria e su administration. Ibi es anque le vigilia del guarda del honor. In le entrata principal del edificio vos vide duo guardianos, vigilante immobilemente del duo lateres del portas. Si vos reguarga per le vitros nigre, vos va vider ancora duo soldatos qui sta ante le bandiera del Republica de Bulgaria. Iste vigilia exprime le respecto del bulgaros al institution del presidente qui symbolisa le unitate del nation, exprime anque le estimation de toto lo que es bulgare, exprimite per le respecto al bandiera. Le guarda national bulgare es vocate a exprimer iste sentimentos.

E nunc imagina que on es ante le entrata principal del Edificio del Presidente. Avicina le hora quando on cambia le vigilia. Impatientemente vos attende de sequer le rito interessante e imprimer lo non solmente in vostre memoria, sed etiam in photographia o in film. In le ultime minuta ante que le horologio marca le nove hora, on audi le tacto famose del marcha del guarda. Post ancora un momento vos les vide.

Photo 10

Le movimento es de novo precise e private de omne elementos superflue. Le fusiles es in position "a bracia", le fila de duo guardianos es rectissime, le levation del pedes es in le mesme altessa. Al fronte, con spada in le mano, le commandante duce le nove vigilia. Ille da le tempore e le dimension del marcha e pro isto le errores es impossibile. In le oculos del guardianos on pote vider sentimento de responsabilitate e contentamento del labor que illes es vocate a facer. Le cambio avicina le entrata principal. Le vigilia es in position "respecto!" Post un ordine le secunde duo soldatos resta in loco e le prime va in le locos que debe esser occupate.

Photo 11

Omnes stoppa simultaneemente e bassa le armas presso lor gambas. Le vetule vigilia face un passo in latere. Le noves sta in lor locos. E post isto on cambia le duo interne, presso le bandiera. Le commandante monta le spada sur le bracio e le soldatos lo repete con le fusiles. Post isto le secunde duo del nove vigilia marcha verso le interior. Isto es perfectemente visibile del latere. Post haber montate un micre scala, le commandante stoppa e face "respecto!", lo que face e le vetule vigilia. Le nove vigilia occupa su locos e bassa su armas. Le commandante torna con su spada sur le bracio e le vetule vigilia le seque, descende le scala e passa per le entrata; le guardianos cambiate qui les attende ibi les seque in tacto de marcha, distantiante se del nove vigilia de honor. On non vide ulle fatiga, ben que le guardianos ha passate un hora in lor posto. Le impression de lor labor continua de esser perfecte, e le beltate que on vide in omne lor movimento vos face surrider. Illes ha jam ganiate vostre sypathias e respecto.

Photo 12

Le filas del guarda lentemente se va, e vostre conscientia non pressa de tornar al vista quotidian del capital bulgare, desirante continer ancora un momento le impression de iste ornation magnific del die gris. Le fabula jam fini e le spectantes le plus impressionate conta le tempore usque al hora sequente — usque al cambio sequente del vigilia de honor.

Photo 13

Le 12 (dece-duo) de julio le guarda national ha su festa. Per pur occasion o no, iste data coincide con le Die del Constitution bulgare, acceptate per le Grande assemblea national in 1991 (anno mille novecentos novanta-un). Como vos jam sape, le nove Constitution considera le servicio militar como honor pro cata un juvene bulgaro. Forsan le plus grande responsabilitate cade sur le guarda national. Esser un guardiano non significa solmente marchar orgoliosemente in placias e aeroportos. Isto es un vocation pro cata uno, entrate in le ordines del guarda national. Le longe tradition de iste subdivision militar de élite face le guardianos exiger plus e plus de se mesme pro attinger e surmontar le nivello del precedentes. Le guarda national ha potite conservar durante le annos su reputation perfecte, executante su missiones con le maximo de su possibilitates, independentemente de lor character, difficultate o responsabilitate. E illos es diversissime: del vigilia ante le entrata principal del Edificio del Presidente al prime loco in le colonna durante le parada militar traditional al Die del Virtute e Festa del armea bulgare, le 6 (sex) de maio; del incontro de chefs de stato al aeroporto al exprimer respecto al memoria del soldatos perite in le guerras per poner un corona de flores ante le Monumento del soldato anonyme in le centro del capital bulgare Sofia.

Photo 14

Il occurre que quasi in le mesme tempore on debe assister a plure locos e pro isto on besonia un organisation perfecte. Le commandantes del guarda national de omne nivellos successivemente surmonta omne problemas, considerante los como un defia personal al experientia e professionalismo — lo que les face meritar un estimation profunde. Usque a hodie io non pote omitter de exprimer lo que io debe al guarda national bulgare que ha un grande participation in le construction de mi personalitate e io spera que io ha potite justificar le sperantia de omnes qui me ha honorate con lor confidentia.

Photo 15

Pro me e pro omnes qui ha sortite del ordines del guarda bulgare es un honor que nos ha essite un parte del tradition e que nos ha lassate nostre lepta como particula de iste beltate inimitabile que, io spera, vos omnes ha potite gustar.

Initio del pagina