Skip navigation.
Home

Cognosce Gdansk!


Le citate Gdańsk (population circa 465.000), antea anque nominate Danzig in germano, es ora le capital del provincia polonese Pomorze. Illo es situate al loco ubi le fluvio le plus importante del pais, le Vistula, disbucca in le Mar Baltic.

Un grande parte del industria del citate es centrate circum le construction de naves e le navigation. Le citate ha duo areas portuari. Le Nove Porto es un grande centro industrial con cantieres naval, manufacturas metallurgic e chimic, molinos a serrar ligno e fabricas que produce alimentos. Le Porto Polnocny o Porto Nord es le plus grande projecto de disveloppamento maritime. Hic eveni le exportation de carbon e le importation de petroleo.

Gdańsk ha scholas de medicina, de ingenieria e de belle artes. In le anno 1970 uno ha aperite le nove universitate. Il ha anque multe ecclesias magnific, theatros e museos interessante, belle jardines e parcos, un centro maritime, un hall de concertos e un opera. Gdańsk es un parte del Trojmiasto (Citate Triple), que se compone del citates Gdańsk, Gdynia e Sopot. Le centro urban, cognoscite como Stare Miasto o Citate Vetule, es situate al bordo del Motlawa, un riviera que disbucca in le Vistula. Edificios remarcabile in le Citate Vetule include le Ecclesia de Sancte Catherina, del qual alicun partes data del 14-te seculo. Su interior es in stilo gothic. Le casa municipal ha essite construite inter 1587 e 1595. In le hall de entrata uno vide un sculptura in basse-relievo de bronzo del astronomo de Gdańsk, le famose Hevelius, qui ha vivite in le 17-me seculo. In le curso de un medie seculo uno ha restaurate tote le edificios historic del citate, que habeva suffrite damnos enorme in le ultime menses del Secunde Guerra Mundial.

Le prime mention de Gdańsk como un citate polonese data de 997 o 999. In le anno 1260 illo ha obtenite autonomia municipal. Alora illo se ha disveloppate como un centro de commercio. In 1308 le Cavalleros Teutonic ha conquirite le citate. Sub lor governamento le citate ha devenite un membro prospere del Liga Hanseatic. In 1466 le rege Casimir IV de Polonia ha reganiate le territorio post un guerra de dece-tres annos. Como regratiamento pro le loyalitate del citate le rege ha date autonomia local a Gdańsk. Tosto le citate se ha expandite multo. Illo ha attingite su apogeo durante le periodo del Renascentia como le porto le plus prospere del Baltico. Su cantieres naval construeva lor prime nave de guerra in 1572. Alicun annos postea su popu1ation cresceva a 77.000, le plus grande inter le citates de Europa oriental. Le guerras svedese del 17-me seculo ha stoppate le crescentia economic del citate e le declino ha comenciate.

In 1772 Prussia ha conquirite Gdańsk e in 1793 illo ha devenite un parte de iste pais. Alora su activitates portuari decresceva rapidemente. Con le exception de circa septe annos durante le guerras napoleonic, quando illo esseva declarate un stato libere, Gdańsk remaneva in manos german usque a post le Prime Guerra Mundial. Inter 1919 e 1939 illo habeva de novo le status de un citate libere, sub le Tractato de Versailles, con Polonia habente grande influentia governative super le citate. Tamen le influentia de Germania deveniva plus forte, e in 1938 le dictator german Adolf Hitler exigeva que Gdańsk debeva esser date a Germania. Polonia, appoiate per Grande Britannia e Francia, refusava. Hitler usava iste refusa como un excusa pro le invasion de Polonia in septembre de 1939, le comencio del Secunde Guerra Mundial. In martio 1945 le citate retornava a Polonia. Conflictos inter le direction communista e le personal del cantier naval de Gdańsk in le anno 1980 duceva al creation del syndicato obrer Solidaritate. Isto ha resultate tosto in democratia in Polonia.

Initio del pagina